Դասավանդման հրավեր ՄՆԿ-ի մեդիակառավարման առցանց դպրոցում

Մեդիա նախաձեռնությունների կենտրոնը (ՄՆԿ) և գերմանական «Deutsche Welle» ակադեմիան, (DWA) «Եվրոպական մեդիահարթակ Հայաստանում. հուսալի և պրոֆեսիոնալ լրատվամիջոցների կառուցում» ծրագրի շրջանակում, մեկնարկում են մեդիակառավարման առցանց դպրոց (Media Management Е-School)։

Դպրոցի նպատակն է օգնել մեդիայի կառավարման գործում ընդգրկված մասնագետներին ավելի արդյունավետ կազմակերպել խմբագրության աշխատանքը, ինչպես նաև թիրախային աշխատել լսարանի հետ, մրցունակ լինել շուկայում, գտնել ֆինանսական ռեսուրսներ ներգրավելու նոր աղբյուրներ, ստեղծել բազմազան, հասցեական և որակյալ մեդիա արտադրանք։

Դպրոցում դասավանդելու համար ՄՆԿ-ն հրավիրում է համագործակցության նշված ոլորտների մասնագետների․

• մեդիայի զարգացում,
• բիզնեսի կառավարում և ֆինանսներ,
• ռազմավարական պլանավորում,
• շուկայաբանություն և մեդիա պրոդուկտների վաճառք,
• աշխատակազմի և մարդկային ռեսուրսների կառավարում,
• գովազդ և հաղորդակցություն,
• տեղեկատվական տեխնոլոգիաներ, թվային զարգացման ռազմավարություն։

Դասընթացավարների ընտրությունը կատարվելու է մրցութային կարգով։  Ընտրված թեկնածուները պետք է պատրաստ լինեն․

• մասնակցելու վերապատրաստման առցանց դասընթացի,
• մշակելու ուսումնական ծրագիր,
• ներգրավվելու մեդիա կառավարման դպրոցի հայեցակարգի մշակման գործընթացին,
• անցկացնելու 2-3 շաբաթ տևողությամբ 3 դասընթաց 2022թ և 2023թթ-ին,
• օգնելու դպրոցի մասնակիցներին որպես մենթոր` ավարտական նախագծեր պատրաստելիս։

2022թ-ի հունվարի վերջում ընտրված 12 թեկնածուներն առցանց դասավանդման թեմայով վերապատրաստում կանցնեն «Deutsche Welle» ակադեմիայի մեթոդաբանությամբ։

Հաջորդ փուլում նրանք կմշակեն և կներկայացնեն  առարկայական ծրագրեր՝ իրենց  նախնական առաջարկների հիման վրա։

Դասընթացավար-մենթորի աշխատանքով հետաքրքրված թեկնածուները պետք է․

• ներկայացնեն կրթական ծրագրի առաջարկ՝ 8-10 թեմա-ժամ պլանով (տե՛ս կից ձևաչափը),
• ունենան նշված ոլորտներում մասնագիտական աշխատանքի փորձ,
• ծանոթ լինեն մեդիայի աշխատանքին և ոլորտի առանձնահատկություններին։

Դասավանդման և լրատվամիջոցների հետ աշխատանքի փորձը կդիտարկվի որպես առավելություն։ Անգլերենի իմացությունը ցանկալի է։

Հետաքրքրված թեկնածուներին խնդրում ենք՝ մինչեւ 2022թ-ի հունվարի 20-ը  [email protected] հասցեին ուղարկել CV (նշելով նաև 2 երաշխավորի անուն և կոնտակտային տվյալներ) եւ կից ձևաթղթով կրթական ծրագրի առաջարկը՝ նամակի վերնագրի տողում գրելով`Application for E-school։

Ընտրված թեկնածուները կհրավիրվեն հարցազրույցի։ Հարցերի կամ լրացուցիչ տեղեկությունների դեպքում դիմեք ՄՆԿ, Նարինե Սաֆարյանին,  [email protected], հեռ․ 055 89 57 00։

Առցանց դպրոցի նախագիծն իրականացնում է Մեդիա նախաձեռնությունների կենտրոնը`«Եվրոպական մեդիահարթակ Հայաստանում. հուսալի և պրոֆեսիոնալ լրատվամիջոցների կառուցում» ծրագրի շրջանակում, որը ֆինանսավորում են Եվրոպական միությունը եւ ԳԴՀ Տնտեսական համագործակցության և զարգացման նախարարությունը։