- March 10, 2020
- Posted by: admin
- Category: Նորություններ
«Լրատուն» նախագծի երրորդ ցուցահանդեսը կրում էր «Առանց գրաքննության. ճակատագրական 8-երի մեդիադրամաներ՝ 1988, 1998, 2008, 2018» խորագիրը։
Այն ներկայացնում է վերջին տասնամյակներին մեդիայում պրոպագանդայի, արտաքին ու ներքին վերահսկողության, ԶԼՄ-ների ու լրագրողների հանդեպ ճնշումների ու բռնության առավել ցայտուն օրինակները։
«Լրատուն» նախագծի ղեկավար Վահրամ Մարտիրոսյանի խոսքով 1988-ին, 1998-ին, 2008, 2018-ին տեղի են ունեցել հասարակական ցնցումներ, որոնք հանգեցրել են նաև մեդիայի արմատական փոփոխության։
«Մեր ցուցահանդեսը ներկայացնում է դրամատիկ օրինակներ, թե ինչպես է ճաք տալիս սովետական գրաքննությունը, բայց հետագայում, արդեն անկախ Հայաստանում, փակվում են թերթեր ու հեռուստատեսություններ, ծեծվում լրագրողներ, ազգային արժեքների շահարկմամբ ստեղծվում նոր պրոպագանդիստական կաղապարներ։ Ցուցահանդեսը մի համառոտ ուղեցույց է տարբերելու անաչառ լրատվությունը կողմնակալից, կաշառված մեդիան անկախ լրատվամիջոցից»,- ասում է նախագծի ղեկավարը։
«Լրատուն» մեդիա թանգարանը հնարավոր է դարձել Ամերիկայի ժողովրդի աջակցությամբ՝ ԱՄՆ Միջազգային զարգացման գործակալության միջոցով իրականացվող «Մեդիան քաղաքացիների տեղեկացված մասնակցության համար» ծրագրի շրջանակում: