Խնդիրների լուծման նախագծեր` Մարդամեջի երիտասարդների կողմից

Նկատել խնդիրը, առաջարկել դրա լուծման տարբերակը, գտնել համախոհներ, ստանալ գումար ու գործի անցնել. Եվրասիա համագործակցություն հիմնադրամի կազմակերպած Մարդամեջ սոցիալական նորարարության հավաքներն այդպիսի հնարավորություն են ընձեռում Հայաստանի մարզերի ակտիվ երիտասարդներին:

2015 թվականի սեպտեմբերին կազմակերպված 6 հավաքների ժամանակ երիտասարդները ներկայացրին երկրում ընթացող բարեփոխումների ոլորտներում (սոցիալական, ապակենտրոնացման, թափանցիկության և հաշվետվողականության) նկատած խնդիրները, առաջարկեցին դրանց լուծման իրենց նախագծերը՝ օնլայն կամ օֆլայն գործիքների կիրառմամբ:

Գյումրու, Վանաձորի, Արմավիրի, Մարտունու, Իջևանի և Սյունիքի Ինֆոտներում անցկացված Մարդամեջերին ներկայացված մոտ 200 հայտերից հանձնաժողովներն առանձնացրին 24-ը՝ չորսական գաղափար յուրաքանչյուր Ինֆոտնից:

Մեկօրյա միջոցառումների ընթացքում 4 նախագծերի հեղինակներն իրենց գաղափարը քննարկում էին մյուս մասնակիցների և ժյուրիի հետ, ապա՝ համակիրների հետ ձևավորում խմբեր: Թիմային աշխատանքի արդյունքում մշակված նախագծերը ներկայացվում էին ժյուրիի դատին, ում որոշմամբ ֆինանսավորում էր հատկացվում դրանցից երկուսին:

«Մարդամեջում ձեռք բերած ամենամեծ փորձառությունը ժյուրիին նախագիծը ներկայացնելն էր»,- ասում է Սյունիքի հավաքի մասնակիցներից Կատյա Բաբայանը: «Հասկացա, որ էական է ոչ այնքան ներկայացրածդ նախագիծը, այլ կարողությունը ժյուրիին համոզել, որ քո գաղափարը մյուսներից ավելի լավն է, որ այն լավագույնն է»:

Նախնական փուլը հաղթահարած 24 նախագծերից 13-ն արժանացան միջինում 250 հազարական դրամի: Սոցիալական, մշակութային, տեղեկատվական և այլ խնդիրների լուծմանն ուղղած ծրագրերն արդեն մեկնարկել են:

Մարդամեջերի ժամանակ ստանալով ՏՏ մասնագետների խորհրդատվությունը՝ մասնակիցներից շատերը փորձել էին իրենց նախագծերում համատեղել օնյալն և օֆլայն գործիքների կիրառումը:

Հաղթող մի քանի նախագծերով ստեղծվող օնլայն հարթակներն ուղղված են տարբեր խնդիրների բարձրացմանն ու լուծմանը: Օրինակ, կապ հաստատել սոցիալական խնդիրներ ունեցող և նրանց աջակցել ցանկացող մարդկանց միջև, կամ, աշխատանք փնտրող՝ հաշմադամություն ունեցող անձի և համապատասխան աշխատանք առաջարկող գործատուի միջև: Մեկ այլ դեպքում կայքը կամ օնլայն այլ գործիքները հնարավորություն են ընձեռում տուրիզմի խթանման, քաղաքային տրանսպորտի ոլորտի զարգացման, ՏԻՄ-երի գործունեության թափանցիկության ու հաշվետվողականության բարձրացման համար:

Ներկայացված նախագծերից մի քանիսն էլ խնդիրների լուծման ավանդական մեթոդներ են առաջարկում՝ բարեփոխումների և ոլորտներում եղած բացթողումների մասին իրազեկում դասընթացների, քննարկումների, ինտերակտիվ թատրոնի, լուսանկարների ու ցուցադահանդեսների միջոցով:

«Քնած մարդու համար Մարդամեջն ազդակ է արթնանալու, մտածելու, գաղափար ներկայացնելու, թիմ ստեղծելու ու դրա միջոցով արդյունքի հասնելու համար»,- ասում է Մարտունու հաղթող նախագծերից մեկի հեղինակ Տիգրան Բաղիշջանյանը, ապա ավելացնում, որ «Մարդամեջը լավ սկիզբ ունենալու հնարավորություն է, իսկ լավ սկիզբը լավ գործի կեսն է»:

Հաղթող, կամ ոչ՝ մասնակիցներից շատերը պատրաստվում են ստացած գիտելիքն ու փորձը հաշվի առնելով՝ նոր և հետաքրքիր գաղափարներով ներկայանալ առաջիկա Մարդամեջերին: Սոցիալ-նորարարական հավաքներից յուրաքանչյուրն իր հետ ինչ-որ բան տանում է՝ նոր գաղափար, նոր ծանոթություն կամ նոր շապիկ:

Մարդամեջ սոցիալական նորարարության հավաքն իրականացվում է «Մեդիան քաղաքացիների տեղեկացված մասնակցության համար» ծրագրի շրջանակում:

Ծրագիրը համատեղ իրականացնում են Մեդիա նախաձեռնությունների կենտրոնը, Եվրասիա համագործակցություն հիմնադրամը և Ինտերնյուսը՝ ԱՄՆ Միջազգային զարգացման գործակալության ֆինանսավորմամբ։

[foogallery id=”4608″]