«Պարզաբանելով ժողովրդավարությունը․ լրագրողական թիմային նախագծի» աշխատարանը Ծաղկաձորում

Ինչպես ներկայացնել ժողովրդավարությունը, պատմել Եվրոպայի մասին մատչելի և ներգրավող լեզվով հայաստանյան լսարանի համար։ Որոնք են այն պատումները, որոնք կարող են բացահայտել եվրոպական քաղաքական համակարգերի էությունը, հանրային մշակույթը, կրթության առանձնահատկությունները, ազատ տնտեսության ներուժը, բարեկեցության հիմքերը, բնապահպանական խնդիրները և դրանց լուծումները։

Այս հարցերի շուրջ ծավալվեցին քննարկումները «Պարզաբանելով ժողովրդավարությունը․ լրագրողական թիմային նախագիծ» աշխատարանի ընթացքում մայիսի 16-17-ին Ծաղկաձորի Սթոունհենջ հյուրանոցում։

Մեր գործընկեր լրագրողների հետ միասին փորձեցինք հասկանալ, թե ինչպես կարելի է ներկայացնել Եվրոպական արժեքային համակարգը, մշակույթների բազմազանությունը, տնտեսական նվաճումները և նորարարությունները և ինչպիսի փորձառություն կարելի է կիրառել Հայաստանում։

Խոսնակներն էին ԵՄ դիտորդական առաքելության հաղորդակցության թիմը` Իսիդորա Ռոսկիչի գլխավորությամբ, Շվեդիայի հանրային հեռուստատեսության քաղաքական խմբագիր Յոհաննա Յոհնսսոնը, Եվրոպական ուսումնասիրությունների փորձագետ Մանե Ադամյանը, որը կենտրոնացավ Հայաստան-ԵՄ CEPA համաձայնագրի խնդիրներին։

Ծրագրի արդյունքում կստեղծվի 15 մուլտիմեդիա նյութ։ Որ լրատվամիջոցը կդառնա այդ նյութերի հրապարակման հարթակ, հայտնի կլինի առաջիկայում։

---

Նախագիծն իրականացվում է Հայաստանում Նիդերլանդների Թագավորության դեսպանության ֆինանսավորմամբ։